Kólumkilli

Kólumkilli kveður

2007-05-07T22:55:00.000Z

Nú hafa orðið ákveðin kaflaskil og þá er meinhollt að hefja nýtt blogg. Mun ég héðan í frá blogga undir eigin nafni, vinsamlegast heimsækið mig á http://kristjanketill.blog.is
kveðja
Kristján

Eldborg 2006

2006-09-03T19:27:00.000Z

Skólafélagar frá Ósló söfnuðust til útivistar á Snorrastöðum við Eldborg um helgina. Hátíðahöldin fóru vel fram og engin mál voru kærð til lögreglu. Við Arnarstapa gengu hátíðargestir fram á hryggsúlu eina mikla og voru menn ekki á einu máli um hvort þar væri á ferðinni beinagrind af hval eða risaeðlu!!

Lausn á vandamálum Náttúrugripasafnsins

2006-08-16T10:23:00.000Z

Endrum og eins rekst maður einfaldar lausnir við flóknum vandamálum. Hér er dæmi um eina. Aðsókn að Náttúrugripasafni Íslands hefur verið dræm að undanförnu og kenna menn ýmsu um: rykföllnum óaðlaðandi sýningum, lítilli gagnvirkni, lélegri markaðssetningu o.s.frv. Ég tel mig hinsvegar hafa fundið ástæðuna. Almenningur telur að einungis megi heimsækja Náttúrugripasafnið á fermingardaginn. En eins og flestir vita eru 14 ára ungmenni ekki komin með bílpróf og þessvegna tilgangslaust að frátaka bílastæði fyrir nýfermd börnin. Þar að auki er töluverður hluti fólks á Íslandi sem hefur aldrei og hyggst ekki staðfesta skírn sína með þeim hætti. Þess vegna legg ég til að þetta skilti verði tekið niður hið bráðasta þannig að aðsókn að Náttúrugripasafni Íslands geti komist í eðlilegt horf.

Gatan mín á Ísafirði

2006-08-08T18:38:00.000Z

Ég var ekki búinn að vera nema 20 mínútur á Ísafirði um daginn þegar bæjarbúar tóku sig saman og nefndu götu eftir mér. Fyrir forvitna þá eru komnar frábærar myndir úr Hornstrandaferðinni frægu á hornstrandir.blogspot.com
kveðja
K

Heilagar Hornstrandir

2006-07-31T21:08:00.000Z

Síðustu helgi eyddi ég á Vestfjörðum nánar tiltekið í Hornvík. Þangað var mér boðið af skólasystur minni frá Ósló henni Helgu Sigríði Úlafsrdóttur. Þar var staddur um 20 manna hópur ungra Vestfirðinga sem reyndist hinn besti félagsskapur.

Mikið var gengið og skoðað m.a. Æðey, Veiðileysufjörður, Hornbjargsviti, Hornbjarg, Kálfatindar, Höfn, Lónafjörður og margt fleira. Hornstrandir eru friðaðar og hefur tófan tekið þar öll völd í náttúrunni. Ótrúlegt var að upplifa yrðlinga éta úr lófa ferðamanna sem þar voru á ferð. Að ári er stefnan tekin á Furufjörð gaman að sjá hvort að maður álpist þangað líka :)

Ferðin var vel skipulögð eins og sést á vef ferðarinnar http://hornstrandir.blogspot.com . Þar koma brátt myndir sem vert er að skoða.
kveðja
K

Óslóborg og Róma

2006-07-01T11:27:00.000Z

Ef þig dreymir ástin mín
Óslóborg og Róma.
Vængjaðan hest sem hleypur og skín,
hleypur og skín með sóma.
Ég skal gefa þér uppá grín
alt með sykri og rjóma.

partur af vögguvísu e. HKL (eftir minni).

2006-06-25T14:45:00.000Z

Skammt frá Akurshús kastala liggur Höfuðey. Sá sem þetta ritar var boðið þangað í gærkvöldi bátasmíði. Höfuðey er fornfræg eyja þar sem áður stóð klaustur eitt mikið. Í dag eru það rústir einar. Útsýnið yfir Óslóborg er stórbrotið var það fest á stafrænt form eins og sést hér. Á myndinni miðri má greina Akurshúskastala. Vinstra megin við kastalann má greina ráðhús Óslóborgar og enn lengra til vinstri glimtir í Vesturbrautarstöðina sem nú hýsir Friðaverðlaunasetur Nóbels.

Efnt til veislu

2006-06-18T11:55:00.000Z

Í tilefni þess að Kólumkilli hverfur skjótt af Noregs grund bauð sá hinn sami til móttöku að Guðrúnarstofu á stúdentabænum að Sogni í gær. Var þar mikið mannaval.

Veigar voru ekki af verri endanum enda hafði Óskar nokkur Níelsson verslað fyrir móttökuna í landamærabúðunum handan Svínasunds. Sænskar kjötbollur, grænmeti og ostapinnar af öllum stærðum og gerðum í þar tilgerðum sósum prýddu veisluborðið. Með þessu var dreypt á köldu ítölsku hvítvíni sem átti uppruna sinn í múskat þrúgum.

Margt vandað söngfólk norskt og íslenskt heiðraði Kólumkilla með nærveru sinni. Það er skemmst frá því a segja að lítill sönghópur var stofnaður á staðnum og íslenski þjóðsöngurinn sunginn af mikill hjartans list á svölum Guðrúnarstofu Óslóbúum til mikillar gleði og furðu.

Kólumkilli vill hér með nýta tækifærið og þakka öllum þeim sem sóttu móttökuna í gær fyrir ánægjulega og minnisstæða kveðjustund.

Halló heimur

2006-06-13T17:14:00.000Z

Halló heimur. Þannig byrja mörg tölvuhugarsmíðin lífsferil sinn og svo er einnig nú. Þú sem rennir augunum yfir ljóspunktana á skerminum ert vitni að fyrstu færslu Kólumkilla eftir að Noregsdvöl er að verða lokið. Fyrri færslur Kólumkilla má finna á http://kolumkilli.blogdrive.com/ þegar þessi orð eru rituð. Góðar stundir.